Бэҕэһээ национальнай библиотека салайааччыта, биир дойдулаахпыт Саргылаана Васильевна Максимова көрдөһүүтүнэн, улуус биир саамай ыраах, уустук суоллаах-иистээх түгэх нэһилиэгэр Түүлээххэ баран кэллибит.
Сырыыбыт сыала- соруга диэн иллэрээ сыл И.Д. Новгородов төрөөбүт өтөҕөр көстүбүт революция саҕанааҕы сэдэх кумааҕы докумуоннары, кинигэлэри өрүһүйүү.
Улууспут урукку олоҕун кэпсиир сэдэх кумааҕы докумуоннары, кинигэлэри улуус администрациятын, киин библиотека үлэһиттэрин өйөбүллэринэн, сыа-сым курдук тутан, аҕалан киин библиотека үлэһиттэригэр туттардыбыт.
Салгыы куораттан национальнай библиотека реставрациялыыр отделын үлэһиттэрэ Бороҕоҥҥо тахсан сэдэх докумуоннары сүүмэрдээн, историческай сыаналаах өттүн талан реставрацияҕа илдьэ барыахтара. Оттон өтөхтөртөн көстүбүт өбүгэлэрбит тутта сылдьыбыт эргэ маллара-саллара улуус музейын фондатын хаҥатыахтара.
Түүлээх түгэҕэр Танда үрэх үрдүгэр Быһыттаахха турар өтөххө суола ииһэ-суох сирдэринэн сырыыны тэрийбит Түүлээх нэһилиэгин баһылыгар Станислав Викторович Винокуровка, бурааннаах уолаттарга: В.В. Бочкаревка, А.В. Ущницкайга улуус краеведтарын ааттарыттан барҕа махталбытын тиэрдэбит!
Мантан инньэ Түүлээххэ үрэх баһыгар кистэнэ сыппыт И.Д. Новгородов төрөөбүт уонна «Кылаайы» холкуос председателин, аҕа дойду улуу сэриитин кыттыылааҕа Ф.Д. Оллонов олорбут өтөхтөрүттэн көстүбүт улууспут урукку олоҕун кэпсиир сэдэх кумааҕы докумуоннар уонна былыргы олоҕу көрдөрөр эргэ мал-сал реставрацияланан дьон көрүүтүгэр-истиитигэр тахсан, бэйэлэрин кэрэ кэмнэрин кэрэһэлии кэпсиэхтэрэ.
Павел Пермяков-Тэлэкэ
