Кулун тутар 21 күнүгэр Мэҥэ Хаҥалас улууһун Моорук нэһилиэгэр гражданскай сэрии дьоруойа Карл Карлович Байкалов төрөөбүтэ 140 сылыгар аналлаах 29-с төгүлүн ыытыллар өрөспүүбүлүкэтээҕи кыһыҥҥы кросс күрэхтэһиитэ буолан ааста.
Күрэхтэһиигэ кытта Дьокуускайтан, Чурапчы, Уус Маайа, Сунтаар, Өлүөхүмэ, Нам уонна Уус Алдан улуустарыттан уонна мэҥэлэр быһый атахтаахтара түмсэн илин-кэлин түһүстүлэр.
Сүүрэр суолга кыра саастаах оҕолортон саҕалаан аҕам саастаах дьон, ол иһигэр биллэр ааттаах-суоллаах сүүрүүктэр таҕыстылар.
Мүрү 1 нүөмэрдээх орто оскуолатын физкултуураҕа учуутала, Манчаары оонньууларын 2 төгүллээх призера, чөмпүйүөнэ Иван Винокуров 10 килэмиэтиргэ сүүрүүгэ 50-59 саастаахтарга кыайыы өрөгөйүн биллэ, пьедестал үрдүкү үктэлигэр турда, анал мэтээлинэн бэлиэтэннэ, харчынан бириэмийэни тутта. Кини кэнниттэн биэтэккэ кэлбит Доброслав Мордосов (Өлүөхүмэ) уонна Василий Спиридонов (Мэҥэ-Хаҥалас) пьедестал иккис, үһүс үктэллэригэр турдулар.
Эти-хааны эрчийэн сүүрүүнэн утумнаахтык дьарыктанар учуутал Иван Николаевич Винокуров үөрэтэр оҕолоругар холобур буолар.
Елена Сыроватская, уопсас.кэрэсп.
