Хапсаҕай түһүлгэтигэр улуус 11 оскуолатыттан сэттэлии спортсменнаах 11 хамаандаҕа барыта 77 үөрэнээччи түмүстэ. Турнир бирииһин уопсай фондата 100 000 солк. Спонсордарынан улуустааҕы хапсаҕай федерациятын чилиэннэрэ, урбаанньыттар буолаллар.
Турнир туһунан федерация бэрэссэдээтэлэ Сергей Черкашин маннык эттэ:
– Улуус хапсаҕайга федерация көҕүлээн бастакытын маннык турниры тэрийдибит. Бу күрэхтэһии инникитин күүстээх хапсаҕайдьыттары таһаарар кэскиллээх турнир буолан, сылын аайы үгэс курдук ыытары былаанныыбыт. Бастакы турнирбытыгар 77 оҕо кытта кэлбититтэн олус үөрдүбүт. Билигин биир сүрүн сыалбытынан бу күрэстэн оҕолору талан, икки сыл устата дарыктаан, бэлэмнээн, 2028 сылга ыытыллар «Азия оҕолоро» оонньууларга кыттар Саха сирин сүүмэрдэммит хамаандатыгар киирэллэрин ситиһии буолар. Онон бу күрэхтэһии ити хайысхаҕа үлэни саҕалааһын буолар. Турнирбытын өйөөбүт улуустааҕы спорт салаатыгар, үөрэх салалтатыгар, урбаанньыттарга махталбын тиэрдэбин.
