Кулун тутар 31 күнүгэр Бороҕоҥҥо Н.Н. Тарскай аатынан спорт дыбарыаһыгар Уус Алдан улууһугар Сомоҕолоһуу уонна бииргэ үлэлээһин, республикаҕа Култуура сылларыгар анаммыт “Илин эҥэр” үөрэхтээһин уокуругун педагогическай үлэһиттэрин XXXVIII спартакиадатын үөрүүлээх арыллыыта буолан ааста.
Тэрээһиҥҥэ үөрэх тэрилтэлэрин бэрэстэбиитэллэрэ, профсойуустар салайааччылара уонна ыалдьыттар мустан икки күннээх күрэхтэһии саҕаламмытын бэлиэтээтилэр.
Спартакиада арыллыыта хамаандалар үөрүүлээх параадтарыттан саҕаланна. Кыттааччыларга улуус баһылыга В.П. Алексеев, СӨ Ил Түмэн народнай депутата, Баһылай Манчаары аатынан өрөспүүбүлүкэтээҕи национальнай көрүҥнэр кииннэрин дириэктэрэ Г.А. Васильев, улуустааҕы үөрэх управлениетын начальнига Ф.Ф. Татаринов, Уус Алдан улууһун үөрэҕин тэрилтэлэрин профсойууһун бэрэссэдээтэлэ Н.Н. Готовцев уонна 1999-2019 сс. профсойуус комитетын бэрэссэдээтэлинэн үлэлээбит Мэҥэ Хаҥалас улууһун Майа сэлиэнньэтин бочуоттаах олохтооҕо С.А. Андреев эҕэрдэлэрин тиэртилэр, кыайыыны баҕардылар.
Спартакиадаҕа Мэҥэ Хаҥалас, Амма, Чурапчы, Таатта, Томпо уонна Уус Алдан улуустарыттан 130 кыттааччы кыттар.
Икки күн устата спортсменнар волейболга, саахымакка, дуобакка, остуол тенниһигэр, буулдьанан ытыыга, гиревой спортка, канат тардыһыытыгар, оҕунан ытыыга, «хабылык», «хаамыска» сахалыы национальнай остуол оонньууларыгар уонна эстафетаҕа күрэхтэһиэхтэрэ.
Улуустааҕы үөрэх управлениетын пресс-сулууспата
