Эрдэ бэлэмнэммит былаанынан күн бастакы аҥарыгар Сыырдаах орто оскуолатын үөрэнээччилэригэр анаан кылаас чааһа буолла. Манна медианан айар дьоҕуру сайыннарыы, историяны үйэтитиигэ ол дьоҕурдара сүрүн оруоллааҕын туһунан кэпсэтии буолла. Студия иитиллээччитэ Лиханди Артем Дьокуускай куоракка ыытыллыбыт “Медиахакатон” күрэҕэр кыттыбытын туһунан иһитиннэрии оҥордо.
Салгыы медиа-киин оҕолоругар анаан студияҕа устар үлэни бэлэмнииргэ маастар кылаас ыыттылар уонна практическай чааһыгар ыҥырыллан кэлбит нэһилиэк бэтэрээннэрин ахтыыларын уһуллулар. Манна СӨ култууратын туйгуна, технология учуутала, Аҕа Дойду сэриитин кыттыылааҕын уола Андросов Василий Николаевич аҕатын олоҕун туһунан сиһилии кэпсээтэ. Кыраайы үөрэтээччи, Бэрт-Ууһун түҥ былыргытын сырдатааччы Копырин Василий Иванович сэрии сут-кураан сылларыгар дьон куйууртан ас таһырынан, аччыктаабакка тыыннаах хаалбыттарын туһунан сэһэргээтэ уонна онно даҕатан бу күннэргэ буолаары турар улахан куйуур күрэҕин билиһиннэрдэ. Онтон ветеран спортсмен Неустроев Иван Григорьевич Сыырдаах бөһүөлэгин спортивнай олоҕуттан, бастыҥ спортсменнар кыайыыларын туһунан бэрт интэриэһиннэйдик ахтан-санаан ааста. Бу төрөөбүт нэһилиэктэрэ сайдарын туһугар үгүс көлөһүннэрин тохпут, олохторун анаабыт уонна билигин да айа-тута таһаарыылаахтык үлэлии сылдьан ытыктанар дьон кэпсээннэрин оҕолор олус болҕойон олорон иһиттилэр. Кинилэр холобур буолар үлэлэрин-хамнастарын дьоҥҥо-сэргэҕэ, үүнэр көлүөнэҕэ сырдаппыттарын иһин улаханнык махтаннылар уонна киэн тутуннулар. Устуу кэмигэр Сыырдаах оскуолатын оҕолоро оператор, корреспондент идэтигэр бэйэлэрин холонон көрдүлэр, историяны үйэтитиигэ бэйэлэрин кылаттарын киллэрбиттэринэн олус астыннылар.
Түмүккэ оскуола салалтата экспедиция кыттыылаахтарыгар нэһилиэк историятын үөрэтиигэ кэлэр кэнчээри ыччакка кыымы сахпыттарыгар истиҥник махтанна уонна оҕолор эбии дьарыктарын сайыннарыыгар биир сүбэнэн салгыы үлэлиир баҕаларын биллэрдилэр. Сыырдаах орто оскуолатын үөрэнээччилэригэр, коллективыгар уонна салалтатыгар дириэктэр Петрова М.М., солбуйааччытыгар Хорунова Нь.С., библиотекарь Бережнова К.Н. айаммытын хааччыйан, үлэлиирбитигэр сөптөөх усулуобуйаны тэрийбиттэригэр «История туоһулара» экспедиция хамаандатын аатыттан барҕа махталбытын тиэрдэбит. «ИСТОРИЯ ТУОҺУЛАРА» экспедиция нэһилиэктэринэн айанын салгыыр
Махталы кытта Окоемова Е.М. 26.03.2026.
