Муус устар 22 күнүгэр, Уус Алдан улууһун дьаһалтата уонна Кытай Норуодунай Өрөспүүбүлүкэтин Хэйлунцзян провинциятын Фуюань куорат уеһын Народнай правительствота доҕордуу сибээһи сайыннарыыга уонна хардарыта бииргэ үлэлээһини кэҥэтиигэ саҥа сөбүлэҥи түһэристилэр. Бу докумуон икки өттүттэн сыһыан саҥа таһымҥа тахсарыгар сүҥкэн суолталаах.
Сөбүлэҥ сүрүн хайысхалара экономика, эргиэн салааларыгар бииргэ үлэлээһиннэри сайыннарыыга, хардарыта барыс уонна бииргэ сайдыы суолугар олоҕуран култуура, үөрэх, туризм уонна спорт сайдыытыгар туһуланар.
Уһун кэмнээх доҕордоһуу тирэҕэ 2015 сыллаахха Харбин куоракка 2-с Арассыыйа-Кытай ЭКСПО быыстапкатын кэмигэр сөбүлэҥ түһэрсиллибитэ. Ол кэмтэн ыла үлэ ситимэ олохтоммута, хардарыта сырыылар буолбуттара, үөрэх, спорт эйгэтигэр холбоһуктаах үлэлэр ыытыллыбыттара. Бииргэ үлэлээһин чэрчитинэн ааспыт сылларга учууталлар, тренердэр уонна специалистар уопут атастаһыыларын сайыннарыыга дуогабардар ситиһиллибиттэрэ. Ону тэҥэ балык бородууксуйатын переработкалааһын эйгэтигэр бииргэ үлэлээһин түстэммитэ. Бу ыытыллыбыт үлэлэр түмүктэринэн бииргэ үлэлээһини салгыы кэҥэтэргэ хардарыта интэриэс баара көһүннэ.
«Биһиги бу сибээһи доҕордоһуу бэлиэтэ эрэ буолбакка, уһун болдьохтоох бииргэ үлэлээһин тутаах механизмын быһыытынан көрөбүт. Биһиги улууспут үөрэх, култуура, спорт, ыччат уопут атастаһыытын хайысхаларынан Фуюань уеһын кытта сыһыаны салгыы сайыннарыыга, ону тэҥэ бииргэ үлэлээһин саҥа көрүҥнэрин көрдөөһүҥҥэ, үөрэх тэрилтэлэрин икки ардыларыгар сибээһи кэҥэтиигэ, оҕо спордун, нуучча уонна кытай тылларын үөрэтии салаатыгар холбоһуктаах бырайыактары өйүүр. Уус Алдан улууһун уонна Фуюань уеһын икки ардыларыгар сибээһи салгыы бөҕөргөтүү уопут атастаһыытыгар уонна холбоһуктаах бырайыактары олоххо киллэриигэ көмөлөһүөҕэ диэн бигэ эрэллээхпит» — диэн улуус баһылыгын бастакы солбуйааччыта Семен Бурнашев бэлиэтээтэ.
Улуус дьаһалтатын пресс-сулууспата.
