Ахсынньы 27 күнүгэр В.В. Никифоров – Күлүмнүүр аатынан “Тойон Мүрү” култуура дыбарыаһыгар улууспут саамай бастыҥтан бастыҥнара – үөрэх туйгуннара, өрөспүүбүлүкэтээҕи, Бүтүн Россиятааҕы олимпиадалар, күрэхтэр кыайыылаахтара, активистар, бастыҥ спортсменнар кыттыыны ыллылар.
Тэрээһини улуус оскуолаларын бастыҥ ырыаһыттара ылбаҕай ырыаларынан киэргэттилэр. Көрөөччүлэр биһирэбиллэрин ордук Дүпсүн орто оскуолатын 11 кылааһын үөрэнээччитэ, “Туой Хайа” өрөспүүбүлүкэтээҕи ырыа күрэҕин кыайылааҕа Ваня Старостин ылла.
Эбии үөрэхтээһин киинин коллектива туруорбут, улуус историятын сырдатар сыаллаах С.С. Васильев – Борогонскай “Талыллыбыт айымньыларыттан“ таҥыллыбыт “Сырдыкка сирдиир өбүгэм аптаах харысхала” остуоруйата киэҥ сэҥээриини ылла. Остуоруйа фонун анимация ньыматынан эбии үөрэхтээһин педагогтара Д. Е. Бурцева, А.А. Стрекаловскай, о.д.а. оҥорбуттара ордук кэрэхсэннэ. Маны таһынан, быйылгы туруоруу биир уратытынан күлүк театр буолла.Остуоруйа ис хоһооно Уус -Алдан улууһун историятыттан үс улуус: Бороҕон, Дүпсүн уонна Байаҕантай улуустарын холбоһууларын уустаан- ураннаан дьүһүйүү буолла. Улуустар терут итэҕэллэрин, харысхалларын күүһүн туһунан ыкса ситимнээн кэпсэнэр. Сүрүн оруоллары «Өркөн» оҕону эбии үөрэхтээһин киинин иитиллээччилэрэ Семен Третьяков, Айсен Кутуков, Айтал Бурцев оонньоотулар.
Улуус бастыҥ үөрэнээччилэрин харыйата
