Бэҕэһээ Дьокуускайга нэдиэлэ кэриҥэ ыытыллыбыт кыргыттар талааннарын, дьоҕурдарын уонна кэрэлэрин арыйар «Мини Мисс Якутия-2026» республикатааҕы куонкурус түмүктэннэ.
Куонкуруска Тулунатааҕы «Татыйык» уһуйаан орто бөлөҕүн иитиллээччитэ түөрт саастаах кэрэчээн Лилиана Носова саамай кыра бөлөххө кыайыылаах үрдүк аатын ылла.
Кыргыттар барыта үс бөлөххө 3-5 саастарыгар диэри, 6-9 уонна 10-13 саастаахтар диэн арахсан кытыннылар. Лилиана бөлөҕөр барыта 8 кыыс кыттыбыт.
Ийэтэ Оксана Носова:
— Бу күрэххэ Лилиана эдьиийин Виленаны кытта иккиэн кытыннылар. Куонкурус олус үрдүк таһымҥа, олус үчүгэй умнуллубат бырааһынньыгы бэлэхтээн буолан ааста.
Куонкуруһу таһынан нэдиэлэни быһа маастар кылааска кыргыттарбытын сыанаҕа хаамарга, саҥарарга, тутта-хапта сылдьарга үөрэттилэр, ону таһынан төрөппүттэри, оҕолору кытта психологтар үлэлээтилэр.
Лилиана бэйэтэ үҥкүүлүүрүн, сыанаҕа тахсарын олус сөбүлүүр. Онон куонкуруска, төһө да улахан уопута суох буолларбыт, үөрүүнү кытта кытынна.
Сааскы сынньалаҥмыт умнуллубаттык ааһан, оҕо саас, кэрэ эйгэ ураты бырааһынньыгар кыттыһан кыайыы көтөллөнөн кэлэн олус үөрдүбүт, астынныбыт, — диэн үллэһиннэ.
