Мунньахха улуус дьаһалтатын салалтата, управлениялар начальниктара, ону таһынан тустаах тэрилтэлэр салайааччылара кыттыыны ыллылар. Улуус дьаһалтатын күнэ республикаҕа биллэр улууспут биир улахан «Биэттэ Агро» хаһаайыстыбаҕа сылдьыыттан саҕаланна.
Хаһаайыстыба салайааччыта Василий Сивцев үлэтин-хамнаһын билиһиннэрдэ, итиэннэ бэйэ бурдугунан оҥоһуллубут килиэбинэн, алаадьынан күндүлээтэ уонна инники өттүгэр бэйэлэрин бурдуктарынан астаан, нэһилиэнньэни хааччыйар баҕа санаалааҕын иһитиннэрдэ. Салгыы нэһилиэк социальнай объектарын көрдүлэр.
Ол кэннэ «Түмсүү» норуот айымньытын киинигэр ыытыллыбыт мунньах олохтоох дьаһалта баһылыга Михаил Белолюбскай дакылаатынан саҕаланна. Билиҥҥи туругунан Баатаҕай нэһилиэгэр статистика көрдөрөрүнэн 540 киһи олорор, оҕо уһуйааныгар 32 оҕо сылдьар, 44 оҕо оскуолаҕа үөрэнэр. Бөһүөлэккэ 14 урбаанньыт, 6 крестьянскай хаһаайыстыбалар үлэлээн олороллор. Анал байыаннай дьайыыга 13 киһи сылдьыбыт, 7 киһи бүтэн кэлбит, 2 киһи сураҕа суох сүппүт, билиҥҥи туругунан 2 киһи байыаннай дьайыыга сулууспалыы сылдьаллар. Сүөһү ахсаана 482, сылгы 736 баара бэлиэтэнэр. Бөһүөлэккэ 217 дьиэ баарыттан 71 дьиэ ититии ситимигэр холбонон олороллор, олор истэригэр 10 социальнай эбийиэк. Быйылгы дьылга Николай Тарскай аатынан спорт саалатыгар, олохтоох балыыһаҕа ис өттүлэригэр быстах өрөмүөннэр ыытыллыбыттар.
Салгыы тэрилтэ салайааччылара бэйэлэрин санааларын тиэрдэн туран, туруорсуулары оҥордулар. Ол курдук Николай Тарскай аатынан Баатаҕай орто оскуолата 1929 сыллааҕы тутуу өрөмүөн күүһүнэн турарын этэн туран, 2029 сылга Николай Тарскай төрөөбүтэ 105, оскуола тэриллибитэ 100 сыллара бэлиэтэнэринэн сибээстээн, саҥа оскуола тутуутун туруорустулар. «Күнчээн» оҕо уһуйааныгар благоустройство, уотун проводтарыгар өрөмүөн, интернет ситимэ холбонуон наадатын эттилэр. Маны таһынан киин котельнай кыамтата кыра буолан нэһилиэк аҥара кыайан холбоммокко олорорун, норуот айымньытын дьиэтэ капитальнай өрөмүөҥҥэ наадыйарын, эдэр специалистарга уопсай дьиэ тутуутун, айан суола мөлтөҕүн уонна да атын боппуруостарга тохтоотулар. Кэлэр 2026 сылга биир дойдулаахтара, история билимин кандидата Дмитрий Дмитриевич Петров төрөөбүтэ 105 сылын туоларын киэҥник бэлиэтииргэ улуус былааҥҥа киллэрэн, тэрээһиннээхтик ыытылларыгар баҕа санааларын тиэртилэр.
Мунньах кыттыылаахтара иһитиннэриилэри истэн баран, Баатаҕай орто оскуолатын бырайыагын оҥорорго, эдэр специалистар дьиэлэрин тутуутун өйүүргэ, норуот айымньытын киинигэр капитальнай өрөмүөн үлэтин ыытарга үлэлэһэргэ, оҕо уһуйаанын толору хааччыллыытын өрөмүөннүүргэ, чааһынай дьиэлэри ититии ситимигэр киллээрии үлэтин сылгыырга, Кэптэни-Баатаҕай айан суолугар өрөмүөн үлэтин ыытарга, Дмирий Петров аатын үйэтитиигэ уонна да атын боппуруостарга бары биир сүбэнэн үлэлииргэ кэпсэттилэр.
Улуус дьаһалтатын пресс-сулууспата.
