Алтынньы 5 күнэ – дойду үрдүнэн Учуутал күнэ бэлиэтэнэр.
Бииргэ үлэлиир коллегаларбытын, улууспут бары учууталларын профессиональнай бырааһынньыккытынан итиитик-истиҥник эҕэрдэлиибит! Ону тэҥэ, быйылгы үөрэх дьылыгар ситиһиилээх коллегаларбытыгар истиҥ эҕэрдэбитин тиэрдэбит.
Ол курдук, эбии үөрэхтээһин киинин директоры иитэр-үөрэтэр үлэҕэ солбуйааччытын Екатерина Петровна Ушницкаяны Саха Өрөспүүбүлүкэтин социальнай-экономическай сайдыытыгар киллэрбит кылаатын иһин Ил Түмэн махтал суругунан, педагог Евгения Климентьевна Местникованы “Бастыҥ эбии үөрэхтээһин педагога” диэн Учуутал уонна наставник сылынан туһуламмыт Уус-Алдан улууһун баһылыгын Гранын ылбытынан, директорбытын Яков Иванович Колодезниковы “Саха Өрөспүүбүлүкэтигэр эбии үөрэхтээһин сайдыытыгар киллэрбит кылаатын иһин” бэлиэнэн наҕараадаламмыттарынан эҕэрдэлиибит!
Сыралаах, үтүө суобастаах үлэҕитигэр үрдүк ситиһиилэри, саҥаттан саҥа дабайыылары, биллэр-көстөр үтүө түмүктэри баҕарабыт! Чэгиэн-чэбдик доруобуйаны, дьиэ кэргэҥҥитигэр или-эйэни, тапталы, дьолу!
