Мин Чараҥ орто оскуолатын 9 кылааһын үөрэнээччитэбин. Биһиги оскуолабытыгар элбэх опыттаах үчүгэй учууталлар бааллар, кинилэр ортолоругар мин биир саамай сөбүлүүр учууталым туһунан билиһиннэриэм. Ушницкая Сардаана Иннокентьевна-саха тылын уонна литературатын учуутала уонна биһиги кылааспыт салайааччыта. Аан бастаан алтыс кылаас боруогун атыллыырбытыгар, кини оскуолабытыгар учууталлыы кэлбитэ. Биһиги кылааспыт оҕолорун кытары бэһис кылаастааҕы салайааччыбытыгар олуһун диэн үөрэммиппит, ол иһин бастаан долгуйан да биэрэр этибит. Баҕар кыыһырымтаҕай, ол эбэтэр кытаанах учуутал буолуо дии саныырбыт. Ол гынан баран, Сардаана Иннокентьевна биһиги санаабыппытыттан олус атын, хас биирдии саҥалыы уруогун аайы кини биһиэхэ чугаһаатар чугаһаан иһэр. Элбэх оҕо саха тыл уруога наһаа бытааннык, интэриэһинэйэ суох ааһар дииллэр, онтон мин санаабар, саамай интэриэһинэй уруогунан буолар саха тыла уонна литературата, бу уруок бүтэрин хаһан да кэтэспэтэҕим, хата бүппэтэ эбитэ буоллар диэн саныыбын. Онно барытыгар учуутал үөрэтэрэ эппиэттиир. Кини уруоктарын куруук аныгылыы, өйдөнөрдк уонна үрдүк таһымнаахтык ыытар, хаһан да чуҥкуйбаккын. Уруоктан ураты кини
биһиэхэ араас оонньуулары оонньотор, элбэх курэхтэргэ кытыннарар, киинэҕэ уонна экскурсияҕа илдьэ барар. Элбэхтэ тэҥҥэ сылдьарбытыттан кылааспыт иллээх уонна бастыҥ буолар.
Төрүт тылбытын сайыннарарыгар, элбэх билиини биэрэригэр улаханнык махтанабын! Ытыктыыр учууталбын Учуутал күнүнэн истиҥник эҕэрдэлиибин!
Ньургуйаана Гуляева,
Чараҥ орто оскуолатын 9 кылааһын үөрэнээччитэ,
«Өркөн» оҕону эбии үөрэхтээһин киинин пресс — киинэ
Уус- Алдан
