Быйыл тохсунньу ыйга улуус баһылыгын отчуоттуур мунньаҕар олохтоохтор саас суол суох кэмигэр айанныырга, таһаҕас таһарга кыһалҕалары көрсөллөрүн этэн туран, бөртөлүөт сырыыта наадатын туруорсубуттара.
Уус Алдан улууһун дьаһалтата бу туруорсууну ылынан, дьон кыһалҕатын өйдөөн «Полярные авиалинии» хампаанньаҕа сайаапка түһэрэн, былаан быһыытынан ыам ыйын 6 уонна 25 күннэригэр икки рейси оҥорору ситиспитэ.
Бүгүн, бастакы бөртөлүөтүнэн Дьокуускай куораттан 17 киһи, ол иһигэр операция кэнниттэн доруобуйаларын чөлүгэр түһэрбит дьон, ону таһынан, Бороҕонтон почтаҕа кэлбит суруктар, биэнсийэ, бырааһынньыктааҕы астара уонна да атын наадалаах туттар маллара тиийэн олохтоохтор сэргэхсийдилэр.
